Թուրինի «Յուվենտուսի» գլխավոր մարզիչ Անտոնիո Կոնտեն վստահեցրել է, որ արդյունքի հասնելու համար պետք է համբերատար լինել, ինչպես նաև իր գոհունակություն է հայտնել թիմի նորեկներից։
«Մենք պարզապես պետք է հավատանք, որ կարող ենք հաղթել, և մեր առջև միայն առավելագույն նպատակներ պետք է դնենք,- Կոնտեի խոսքերն է մեջբերում Corriere dello Sport-ը,-միաժամանակ պակաս կարևոր չէ գիտակցել այն, որ մենք ճանապարհի սկզբին ենք։ Իսկ ինչ-որ մեծ բան կառուցելու համար համբերատարություն է պետք, քանի որ մենք հիմա դեռ հիմք ենք գցում։
Տիտղոսի հիմնական հավակնորդներն են մնում «Միլանն» ու «Ինտերը»։ Ինչ վերաբերում է թիմին՝ ես լիովին գոհ եմ կազմից, նորեկները հիանալի ինտեգրվել են։ Այնպես որ թիմային խաղ ցուցադրելու համար մեզ մի փոքր ժամանակ է հարկավոր։
Անցած մրցաշրջանում «Յուվենտուսը» զբաղեցրել է Ա սերիայի մրցաշարային աղյուսակի 7-րդ հորիզոնականը և չի հայտնվել եվրագավաթներում։
