 «Մենք գիտենք, որ պետք է առաջընթաց գրանցել»,-Բերլուսկոնիի գավաթի ավարտից հետո նշել է «Ծեր Սինյորայի» գլխավոր մարզիչ Անտոնիո Կոնտեն,-«Դա նորմալ է, քանի որ մեր աշխատանքը դեռ շարունակվում է: Ցանկանում եմ առանձնացնել այն, թե ինչպես թիմն արձագանքեց երկրորդ խաղակեսում: Կարծում եմ` ոչ ոքին ավելի արդար արդյունք կլիներ: Ուդինեում կայանալիք հանդիպումից առաջ չեմ անհանգստանում, քանի որ թիմն աստիճանաբար լավ մարզավիճակ է ձեռք բերում»:Անդրադառնալով Արտուրո Վիդալին` Կոնտեն նշել է, որ Վիդալն առայժմ պատրաստ է խաղալ միայն 20 րոպե: «Ձախ թևում նա կարողանում է հիանալի տեղաշարժվել` շնորհիվ իր ճարպիկության: Պետք է հիշել, որ նա վերջերս է միացել մեզ և նոր է սկսել մարզումները թիմի հետ, որը ցանկանում է հաջողության հասնել»: Խաղից ստացված տպավորություններով է կիսվել նաև թուրինցիների նորեկ պաշտպան Շտեֆան Լիխտշտայները. «Ուզինեում մեզ պետք է այն «Յուվեն», որը տեսանք երկրորդ խաղակեսում: Չպետք է քեզ թույլ տաս թուլանալ նման խաղերում: Պետք է ամենասկզբից խաղայինք այնպես, ինչպես երկրորդ խաղակեսում: Ընդմիջումից հետո մենք ավելի ագրեսիվ էին, և արդյունքն ակնհայտ է»: «Յուվեի» մյուս պաշտպանը` Ջորջիո Կիելինին իր հիասթափություն է հայտնել «Միլանի» հետ խաղի արդյունքից: «Երբ «Միլանը» չափից շատ տարածք է ստանում, ապա նա պատժում է մրցակցին, քանի որ հիանալի թիմ ունի, ինչն ապացուցեց այսօրվա գոլերով: Այնուամենայնիվ, երկրորդ խաղակեսում մեր տրամադրվածությունը թույլ տվեց մեզ վերադառնալ խաղին, և ես համարում եմ, որ խաղավերջում կարող էինք ոչ ոքի գրանցել: Ցավալի է, պարտվելը միշտ էլ վատ է, սակայն երկրորդ խաղակեսում ցույց տված խաղը թույլ կտա մեզ հանգստանալ Ուդինե մեկնելուց առաջ: Ակնհայտ է, որ այնքան էլ ցանկալի չէ մեկնարկում հանդիպել Ֆրիուլիի թիմի հետ, որը հիանալի մարզավիճակում է գտնվում և պայքարում է Չեմպիոնների լիգայում: Սակայն մենք հենց սկզբից մեզ ամբողջովին կնվիրենք խաղին»,-նշել է իտալացի պաշտպանը:
|
