Հայաստանի մինչև 21 տարեկանների հավաքականը հաջող է մեկնարկել Եվրո-2013-ի ընտրական մրցաշարի առաջին խաղում՝ սեփական հարկի տակ 4-1 հաշվով վստահ առավելության հասնելով Մոնտենեգրոյի իրենց հասակակիցների նկատմամբ:
Մեր երիտասարդականը հաջորդ հանդիպումն անցկացնելու է սեպտեմբերի 3-ին՝ մրցակցի հարկի տակ ուժերը չափելով Անդորրայի ընտրանու հետ, իսկ 3 օր անց հյուրընկալվելու է Չեխիային: ArmSport.am- ը Հայաստանի երիտասարդական հավաքականի և "Բանանցի" գլխավոր մարզիչ Ռաֆայել Նազարյանին խնդրեց ներկայացնել, թե ինչպես է հավաքականը նախապատրաստվելու առաջիկա հանդիպումներին:
-Մինչև Անդորրայի հավաքականի հետ հանդիպումը ֆուտբոլիստները կխաղան իրենց թիմերում: Այդ ընթացքում ուսումնամարզական հավաք չի անցկացվի, քանի որ մեր ազգային հավաքականը օգոստոսի 10-ին ընկերական հանդիպում է անցկացնելու: Իսկ լիտվացիների հետ այդ խաղին ներգրավված են նաև երիտասարդական հավաքականի ֆուտբոլիստներ: Այդ պատճառով նպատակահարմար չհամարեցինք այս ժամանակահատվածում հավաք կազմակերպել:
Ընկերական հանդիպումից հետո՝ օգոստոսի 14-ին, 20-ին և 27-ին կայանալու են Հայաստանի առաջնության բարձրագույն խմբի հանդիպումները, իսկ երիտասարդական հավաքականի ֆուտբոլիստների մեծ մասն ընդգրկված են իրենց թիմերի հիմնական կազմերում: Այնպես որ, լավագույն դեպքում հնարավոր էր միայն երկօրյա հավաքների անցկացումը:
Ճիշտ է, նախկինում նման կերպ վարվել ենք, սակայն այս անգամ նպատակահարմար գտանք, որ մեր ֆուտբոլիսներն իրենց թիմերի կազմերում հանդես գան և լիարժեք մասնակցեն առաջնության խաղերին: Իսկ ուսումնամարզական հավաք կկազմակերպվի օգոստոսի 30-ին' Անդորրա մեկնելուց առաջ:
- Հայաստանի առաջնության վերջին տուրի՝ "Միկա"-"Բանանց" հանդիպմանը ձեր սաները հյուրերի դերում էին: Այս խաղում կային ֆուտբոլիստներ, ովքեր հնարավոր է առաջին անգամ հրավիրվեն հավաքական:
-Դրական տպավորություն թողեց "Միկայի" աջ եզրային Արեգ Ազատյանը: Նա բավական ակտիվ էր գործում, իսկ "Բանանցից"՝ Դավիթ Սուջյանը: Ճիշտ է, նա վնասվածքի պատճառով փոխարինվեց, սակայն մեր ուշադրության տակ է: Բայց դեռևս չեմ կարող հստակ ասել, որ նրանք կհրավիրվեն հավաքական: Առաջնության առաջիկա հանդիպումներում, եթե նրանք լավ խաղան, բնականաբար իրենց տեղը կունենան հավաքականում:
-Իսկ արտերկրում հանդես եկող մեր հայրենակից ֆուտբոլիստներից նոր թեկնածուներ չկա՞ն:
-Մենք մտադիր էինք թիմ հրավիրել 2-3 ֆուտբոլիստներ, ովքեր դրսում են խաղում: Մասնավորապես, ցանկանում էինք Ռուսաստանից հրավիրել Խորեն Բայրամյանին և Կարեն Հակոբյանին: Երկուսն էլ կիսապաշտպանական գծի խաղացողներ են: Խորենը հանդես է գալիս "Ռոստովում" և թիմի հիմնական կազմում մի քանի անգամ խաղացել է Ռուսաստանի բարձրագույն խմբի առաջնությունում, իսկ Կարենը Մոսկվայի «Դինամոյի» երիտասարդական թիմի խաղացող է: Մեր ցանկությունն էր, որ նրանք ժամանեին "Բանանց", որպեսզի տեղում ծանոթանայինք նրանց հնարավորություններին: Սակայն այս հարցում նրանց ակումբները չընդառաջեցին մեզ:
-Սակայն դա հավանաբար չի՞ խանգարի, որ նրանք ընդգրկվեն երիտասարդական հավաքականում:
-Իհարկե, կձգտենք նրանց ներգրավել մեր հավաքականի կազմ: Սակայն այս դեպքում որոշակի խնդիրներ են առաջանում, ֆուտբոլիստների համար, քանի որ մեր հավաքականի կազմում խաղալու դեպքում, նրանք իրենց թիմերում լեգեոնական ֆուտբոլիստներ են համարվում, ինչն անցանկալի է ակումբներին: Իսկ պատճառն այն է, որ Ռուսաստանում լեգեոնականների սահմանափակում կա:
-Սեպտեմբերի 3-ին մեր մրցակիցն Անդորրայի հավաքականն է: Հավանաբար այս խաղից կարելի է ակնկալել 3 միավոր...
-Ցանկալի է, որպեսզի ֆուտբոլիստները յուրաքանչյուր խաղում 3 միավոր վաստակելու հոգեբանությամբ մտնեն խաղադաշտ: Եվ այս դեպքում պետք չէ մրցակիցներին տարբերակել: Ճիշտ է, անդորրացիները համարվում են մեր խմբի ոչ ամենաուժեղ թիմը և տանն անցկացրած 2 հանդիպումներում էլ պարտվել են, սակայն մրցակցին չպետք է թերագնահատել: Փորձը ցույց է տալիս, որ թերագնահատելու դեպքում հատուցումը շատ խիստ է լինում: Մենք պետք է կենտրոնացված գործենք ինչպես Անդորրայի, այնպես էլ՝ մեր մյուս մրցակիցների' Չեխիայի, Ուելսի, Մոնտենեգրոյի հավաքականների հետ հանդիպումներում:
-Անդորրայի հետ հանդիպումից 3 օր հետո մեր թիմն արտագնա խաղում հանդիպելու է չեխերի հետ, իսկ վերջինիս շատերը խմբի հաղթողի հիմնական հավակնորդ են համարում...
-Իրոք, բոլորին է հայտնի, որ այդ երկրի ֆուտբոլը բարձր մակարդակի է: Նրանք դեռևս այս շրջափուլում հանդիպումներ չեն անցկացրել, սակայն նրանց ներուժը բավական մեծ է: Յուրաքանչյուր մրցակցի հետ էլ կարելի է պայքարել և դրական արդյունքի հասնել: Անդորրացիների հետ խաղում հաղթանակի դեպքում, կարծում եմ, մեր տղաները լրացուցիչ ուժ կստանան նաև այդ մրցակցի դեմ դրական ելք ապահովելու համար: